Ntsio iin kii iin yakui ntivixi, jii yuku koo sa’mi, sara ntakaninia nixi sava’i sa’mi. Ntantuki yu’a sara kikui. Kiku xeen kiku nchu’i ñantu’i ka.

Nikitsaa iin tsoko sara nikachia saan: -¿Nchii , mpaa luu?
-Kiku -nikachi yakui ka.
Sara nikachi ka: “Kua’a sa’mu, nakiku nachinchee yo. Natsinu sa’mu ra nako’on viko.

Sara nchinchee tsoko ka ka. Kiku keuyi vari yakui ka ra koo sa’mi.
Cha nikitsaa tsoko ka kikui tiku nani nchu’a, sara nikachi yakui ka:
-Kue va’a kiku ku. Kini xeen na’a sa’ma sa’u.
Ntakinchai sa’mi kiku mii kuachi.
Sara ntsinu sa’mi nikuu yakua xeen ña, sara tsoko ka:
-Nako’on viko.
-Ma ku’un yu, vari xeen kaa sa’ma. Nchaan ntakacha ña -nikachi yakui ka.
-Kue sa’a ni, nako’on -nikachia.

Niki’in kueyi kua’in. Nikitsaa ta savi sara ntuvii sa’mi sara nikuachi.
Ta ntsa’i ka, nikitsaa kueyi tsain kueyi , ntsi’i kueyi ra ntsinia. Sara ma nikuni ka tsoko ka ntanchikui tsi yakui ka.

Vatsi ntitsi yakui ka. Nikitsai kava ka niya’a tsa’i, nikavi niketi mancha ini yuu. Sara ntakoo tuki tsiki tsiki kua’an nui.

Ntatsa’i vi’i kisi si ña vitsi, sara ntasta’in takua kutunia.
Nikuyachia nuu ituu tsio ña ra niki'vi yaa sa’mi.

Tsa’a ña ntiñu’u kui yee vichi.